Paplajahan 2: Sapengrauh Roh Sang Hyang Pengardi lan Urip Pengiring Sang Hyang Yesuse ring Pasamuan
Saking Cakepan Para Utusan 2
Sasampune Sang Hyang Yesus kaunggahang ka swarga olih Sang Hyang Pengardi, para sisiane sami meneng ring Yerusalem nyantosang Roh Sang Hyang Pengardi sane kajanjiang.
2
Risedek rarainan Pentakostaa, anake makasami sane pracaya ring Sang Hyang Yesus mapunduh ring salah tunggal umah. 2 Jeg saget ipun sami mirengin suara keras saking langite sekadi suaran angin sane ageng ngebekin umahe punika. 3 Raris ipun nyingakin sekadi muncuk-muncuk api maideh-idehan tur ngencegin ipun suang-suang. 4 Irika raris anake sane pracaya punika kaebekin olih Roh Sang Hyang Pengardi. Tur Ida nglugrahin ipun sami mangda ngawitin mawicara nganggen basa sane malian-lianan sane nenten taen ipun uningin.5 Duk punika ring Kota Yerusalem akeh meneng anak Yahudi sane rauh saking negeri-negeri lianan ring jagate. Ipun makasami satya mabakti ring Sang Hyang Pengardi. 6 Ritatkala mirengin suara sane keras punika, anake akeh raris nampekin umahe punika. Raris ipun sami makesiab krana ipun mirengin sisiane punika mawicara nganggen basan ipune suang-suang. 7 Anake akeh punika angob saha mabaos sapuniki, “Boyake anake sami punika anak saking Wawidangan Galilea? 8 Napike mawinan anake puniki prasida mawicara nganggen basan iragane suang-suang?
14 Raris dane Petrus ngadeg kasarengin olih solas para utusan lianan. Irika dane masuara keras ring anake akeh sekadi puniki, “Duh para semeton titiang Bangsa Yahudi tur semeton sami sane meneng ring Kota Yerusalem. Pirengin ja melah-melah, mangda semeton uning paindikan puniki. 15 Sujatine ipun sami nenten ja punyah sekadi sane kaden semeton. Krana mangkin kari jam sia semengan, tur budayane iriki nenten taen anake punyah kali mangkin. 16 Nanging paindikane puniki sampun kanikayang olih Sang Hyang Pengardi malantaran cakepan sane katulis idumun olih sinoman Idane sane mapesengan dane Yoel. Dane sampun nulis sekadi puniki:
17 Sang Hyang Pengardi masabda sekadi puniki, ‘Duk makire panyuud jamane,
Nira bakal nedunang Roh Nirane sid manusane makejang.
Ento mawinan soroh sentanan ceninge luh wiadin muani bakal ngortiang pabesen saking Sang Hyang Pengardi.
22 Raris dane Petrus nglanturang mabaos sapuniki, “Duh para semeton anak Israel! Pirengin ja atur titiange puniki! Sang Hyang Yesus saking Nasaret punika nenten tios utusan Sang Hyang Pengardi buat para semeton sami. Indike punika sampun kabuktiang krana Sang Hyang Yesus makarya paindikan sane ngangobin ring tengah-tengah semeton sami. 23 Sang Hyang Yesus puniki kaserahang olih Sang Hyang Pengardi manut rencanan Idane, tur semeton ngamademang lan nyalibang Sang Hyang Yesus malantaran anake sane dursila. 24 Nanging Sang Hyang Pengardi nguripin Ida saha mebasang Ida saking kasengsaran pademe. Krana kuasan pademe nenten prasida sue nguasain Ida.
36 Raris dane Petrus nglanturang malih mabaos sapuniki, “Sane mangkin makasami anak Israel musti uning indik Sang Hyang Yesus sane saligang semeton punika. Sang Hyang Pengardi sampun ngranayang Ida dados Sang Ratu Agung taler dados Sang Prabu sane sampun kajanjiang.”
37 Ritatkala anake akeh punika mirengin baos dane Petrus, manah ipune sami kalintang sungsut, saha mataken ring dane Petrus sareng para utusan sane lianan sapuniki, “Semeton para pengiring Sang Hyang Yesuse, napike sapatutne sane laksanayang tiang sami?”
38 Irika raris dane Petrus masaur sapuniki, “Masalin ja saking urip sane madosa tur semeton sapatutne kalukat dados tanda semeton ngiring Sang Hyang Yesus Kristusb. Mangda dosan-dosan semetone kaampurayang tur semeton nerima Roh Sang Hyang Pengardi. 39 Krana Sang Hyang Pengardi jagi nglaksanayang janjin Idane ring para anake sane sampun kapanggil, nenten tios ngawit saking semeton tur soroh sentanan semetone turmaning anake akeh sane adoh saking iriki.”
40 Sasampune mabaos sapunika, dane Petrus akeh mababaosan lianan sane nuturin mangda ipun sami malasang dewek saking soroh anake sane jaat puniki duaning anake jaat jagi kaukum olih Sang Hyang Pengardi.
41 Sasampune anake akeh punika mirengin baos dane Petruse, akeh anake irika dados pracaya raris kalukat. Akeh anake pracaya dinane punika kantos wenten tigang tali (3.000) diri.
42 Anake sane pracaya punika seleg mirengin pengajahan para utusan Sang Hyang Yesuse tur sering mapunduh nyikiang manah. Kenten pada ipun mabakti miwah ngajeng sareng-sareng. 43 Samaliha para utusan Sang Hyang Yesuse nglaksanayang akeh paindikan sane ngangobin sane mawinan anake akeh dados angob tur jejeh. 44 Anake sane sampun pracaya ring Sang Hyang Yesus punika sering mapunduh. Tur sekancan druen ipune suang-suang dados druen semeton sareng sami. 45 Wenten pada saking ipun sane ngadol barang-barangnyane tur jinahne kaedum-edumang manut kaperluan ipune suang-suang. 46 Sebilang dina ipun sami seleg mapunduh ring Genah Agung Mabakti kapining Sang Hyang Pengardi. Kenten pada ipun sami ngajeng sareng-sareng magilir ring umah ipune sami, saha masukarena antuk las manah. 47 Ipun sami setata ngagungang Sang Hyang Pengardi tur wargane irika seneng kapining ipun. Samaliha sebilang dina ngakehang anake sane katuntun olih Sang Hyang Yesus mangda kaslametang lan kapunduhang ring pasamuan anake pracaya.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”